Իզմիրի տիեզերագիտական ճամբար 2014
Նախագծի ղեկավար` Լևոն Արամյան
«Մխիթար Սեբաստացի» կրթահամալիրի սովորողներն արդեն 3 անգամ հաջողությամբ մասնակցել են Իզմիրի միջազգային տիեզերագիտական ճամբարին, որն աշխարհում գոյություն ունեցող ՆԱՍԱ-ի 4 ճամբարներից մեկն է` տարածաշրջանում առայժմ միակը: Ճամբարը վճարովի է (մեկ անձի համար 800$), սակայն նախորդ տարիների հաջող մասնակցությունը կրթահամալիրին ապահովում է մասնակցության կրթաթոշակներով: Այս տարի նույնպես «Տիեզերք» ակումբի սովորողները կմասնակցեն ճամբարին: Ստորև ներկայացված է ճամբարին նախապատրաստման և մասնակցության նախագիծը.
Նպատակը. Նախագծի նպատակն է հաջողությամբ նախապատրաստվել և մասնակցել 2014 թ. Իզմիրի տիեզերագիտական ճամբարին: Հիմնական նպատակներից է նաև ճամբարի մասնակիցների ընտրությունը ճիշտ և մրցակցային կազմակերպումը` մինչ այդ բոլոր ցանկացողներին (նաև այլ դպրոցներից) «Տիեզերք» ակումբի պարապմունքների միջոցով համապատասխան գիտելիքներ հաղորդելով:
Ժամանակացույցը. Սկիզբը` 2013 թ. հոկտեմբերի 1: Ավարտը` ճամբարից վերադարձ (նախնականորեն 2014 թ. օգոստոս):
Իրականացման ձևը.
- Առաջին քայլը դա ճամբարին մասնակցելու հրավերի տարածումն է համացանցի, expo-ների,այցելությունների և այլ եղանակներով:
- Ցանկացողների գրանցում (ավարտը մայիս, 2014 թ.):
- Գրանցված մասնակիցների համար աստղագիտության, տիեզերագնացության և անգլերենի ինտենսիվ պարապմունքներ:
- Մասնակիցների կողմից տիեզերագիտական անգլերեն-հայերեն և հայերեն-անգլերեն բառարանի ստեղծում (միջանկյալ նախագիծ):
- Մասնակիցների ընտրություն ըստ օբյեկտիվ ցուցանիշների` ձեռք բերած գիտելիք, մոտիվացիոն նամակ («ինչու եմ ցանկանում մասնակցել Իզմիրի տիեզերագիտական ճամբարին») անգլերենի իմացություն: (2014 թ. հունիս)
- Ընտրված մասնակիցների նախապատրաստում ճամբարին` երգ, պար, Հայաստանի, «Մխիթար Սեբաստացի» կրթահամալիրի և «Տիեզերք» ակումբի մասին անգլերեն տեսանյութերի պատրաստում:
- Ընտրված խմբով կարճաժամկետ ճամփորդություններ Հայաստանի Հանրապետության տարբեր մարզեր. տեղեկանալու համար խմբի` ճամփորդությունների մեկնելուն պատրաստ լինելուն: (հունիս և հուլիս ամիսներ)
- Մասնակցություն ճամբարին և հայրենագիտական ճամփորդություն դեպի Արևմտյան Հայաստան (օգոստոս, 2014 թ.)
Ակնկալվող արդյունքները. Բոլոր գրանցվածներին աստղագիտությունից և տիեզերագնացությունից համապարփակ գիտելիքի հաղորդում: Գործնական գիտելիքների ձեռք բերում: Շփումների և կապերի հաստատում այլազգի սովորողների հետ: Ծանոթություն պատմական հայրենիքին: Հաջորդ տարվա համար նոր կրթաթոշակների ստացում: